ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិនៃកម្ពុជា បានបដិសេធទាំងស្រុងចំពោះលិខិតដែលបានផ្សព្វផ្សាយដោយក្រុមហ៊ុន French OL Group ចុះនៅថ្ងៃទី១៣ ខែឧសភា ឆ្នាំ២០២២ ដោយប្រើឡូហ្គូ និងត្រាក្លែងបន្លំរបស់ក្រសួងការបរទេស។

ក្រសួងការបរទេស បានអះអាងថា ក្រសួងពុំដែលចេញលិខិត ឬអនុញ្ញាតឱ្យក្រុមហ៊ុនខាងលើនេះធ្វើអាជីវកម្មនៅកម្ពុជាឡើយ។

ការចេញមុខមកបំភ្លឺនេះ ធ្វើឡើងក្រោយពីឃើញក្រុមហ៊ុន OL Football Cambodia បានផ្សព្វផ្សាយនូវលិខិតជាភាសាអង់គ្លេសនៅថ្ងៃទី២៤ ខែកញ្ញា ឆ្នាំ២០២២ ដោយបញ្ជាក់ថា ក្រុមហ៊ុនទទួលបានការយល់ព្រមពីក្រសួងការបរទេសកម្ពុជាឱ្យក្រុមបាល់ទាត់ OL របស់បារាំងចូលមកកម្ពុជា។

ក្រសួងការបរទេសអំពាវនាវដល់អាជ្ញាធរមានសមត្ថកិច្ចពាក់ព័ន្ធ ត្រូវស៊ើបអង្កេត និងចាត់វិធានការតាមផ្លូវច្បាប់ ដើម្បីទប់ស្កាត់ករណីនេះឱ្យបានឆាប់បំផុត៕